საქართველოში შეიქმნა სპეციალური „ცხელი ხაზი“, რომელსაც შეუძლიათ მიმართონ მოქალაქეებმა ზამთრის პერიოდში უსახლკარო ადამიანებისთვის დახმარების გაწევასთან დაკავშირებით, რის შესახებაც აცხადებს რეგიონული განვითარებისა და ინფრასტრუქტურის სამინისტროს პრეს-სამსახური, გადმოგვცემს „ახალი ამბები-საქართველო“.

„ცხელი ხაზის“ ნომერია _ (995) 32 251 07-74.

„იმდენად, რამდენადაც ორი დღის განმავლობაში უამრავმა ადამიანმა გამოთქვა უსახლკარო თანამემამულეებისათვის დახმარების სურვილი სოციალურ ქსელებსა და ტელეფონით, ამოქმედდა „ცხელი ხაზი“, სადაც ადამიანებს შეუძლიათ მიიღონ კონსულტაციები,  გადასცენ ტანსაცმელი, საკვები ან სხვა საგნები. ასევე მოქალაქეებს შეუძლიათ ინფორმაციის დატოვება უსახლკაროების ადგილსამყოფელთან დაკავშირებით“, _ საუბარია უწყების შეტყობინებაში.

წუხელ ღამით, თბილისის გარეუბანში, მოსკოვის გამზირზე გაიხსნა პირველი თავშესაფარი უსახლკაროებისათვის, გაიშალა ოთხი კარავი, რომელიც გათვლილია 80 ადამიანზე. კარვებში არის შეშის ღუმელები, საწოლები, მატრასები, პლედები, გაყვანილია ელექტრობა და დამონტაჟებულია სველი წერტილები. ტერიტორიაზე არსებობს მედპუნქტი, ასევე გაშლილია კარავი, რომელიც ასრულებს სამზარეულოს ფუნქციას.

უსახლკაროებისთვის თავშესაფრის ორგანიზების პროცესში აქტიურად მონაწილეობენ საქართველოს რეგიონული განვითარებისა და ინფრასტრუქტურის, თავდაცვის, შინაგან საქმეთა, ფინანსთა, ეკონომიკის, შრომის, ჯანმრთელობისა და სოციალური დაცვის სამინისტროების წარმომადგენლები, ასევე მთავრობის კანცელარია.

საქართველოს მასობრივი ინფორმაციის საშუალებების მონაცემებით, ქვეყანაში ტემპერატურის მკვეთრი დაცემის გამო დეკემბერში დაიღუპა ორი უსახლკარო ადამიანი.