ჩერნოვეცკის საქველმოქმედო ფონდი, 4 წელიწადზე მეტია ზრუნავს მარტოხელა, ყველასგან დავიწყებულ ხანდაზმულ ადამიანებზე.

ნიკოლოზ და ვენერა ჭუმბურიძეები ჩვენი ფონდის ბენეფიციარები არიან, მათ 50 წელი იცხოვრეს ერთად და ერთმანეთი ახლაც ისე უყვართ, როგორც ადრე!

ქალბატონმა ვენერამ, სკოლის დამთავრების შემდეგ ბიბლიოთეკაში დაიწყო მუშაობა, სადაც იგი მომავალმა მეუღლემ, ახალგაზრდა ნიკოლოზმა შენიშნა და პირველივე ნახვით შეუყვარდა ლამაზი გოგონა.

მან ხელი სთხოვა ვენერას და 1966 წლის 26 ოქტომბერს იქორწინეს კიდეც. ამ დღეს უკვე 50 წლის განმავლობაში დიდი რუდუნებით აღნიშნავენ და არასდროს ავიწყდებათ ის.

ერთად იმდენი განსაცდელი გადაიტანეს, გახსენებაც კი უჭირთ...

„აფხაზეთის ომის დროს, ჩემი ბუჭა (ასე ეძახის ვენერა მეუღლეს) საომრად წავიდა. მაშინ 62 წლის იყო ის ხომ სამხედროა, გენერალ–მაიორი! ძალიან ვნერვიულობდი, მეშინოდა... მაგრამ პირობა მომცა, რომ ჩამოვიდოდა და მარტოს არ დამტოვებდა. დაჭრილი ჩამომიყვანეს, ძლივს გადარჩა. საავადმყოფოდან რომ გამოვიყვანე, მთელი წელი სახლში ვუვლიდი და ფეხზეც დავაყენე. მის გარეშე ჩემს ცხოვრებას რა აზრი აქვს? ის ჩემი ცხოვრებაა!“ – ამბობს ქალბატონი ვენერა და მეუღლეს ეალერსება.

ახლა კი 88 წლის ნიკოლოზი, რომელსაც ოთახში გადაადგილება უჭირს,  თავად უვლის მეუღლეს. ქალბატონი ვენერა, დავარდა და ფეხი მოიტეხა, და ახლა მხოლოდ მეუღლეზეა დამოკიდებული. ნიკოლოზი მას საჭმელს უმზადებს, ურეცხავს...

„მთელი ცხოვრება ხელის გულზე მატარებდა, მეფურად მივლიდა და ახლა მას სითბოს და სიყვარულს ვუბრუნებ. ვიცი რომ ისე ვერ ვუვლი როგორც საჭიროა, მაგრამ ვცდილობ.“

ამ არაჩვეულებრივ ადამიანებთან საუბარი – ერთი სიამოვნებაა, ჩვენი ფონდი ყველანაირად ცდილობს, რომ მათ ცხოვრება შეუმსუბუქოს. ჩვენ მათთვის პროდუქტები და წამლები მიგვაქვს, რადგან მიზერული პენსია კომუნალურ გადასახადებში ძლივს ჰყოფნით.

ერთადერთი, რაზეც ეს მოხუცები ოცნებობენ, ეს სარეცხი მანქანაა. ბატონ ნიკოლოზს უკვე ძალიან უჭირს სარეცხის რეცხვა, დამხმარე კი არავინ ჰყავთ!

თუ გაქვთ საშუალება აუსრულოთ ამ შესანიშნავ ადამიანებს ოცნება, თანხა შეგიძლიათ ჩარიცხოთ ჩვენი ფონდის ანგარიშზე GE15TB7194336080100003 და GE64BG0000000470458000 (დანიშნულება: ჭუმბურიძეების ოჯახი) ან პირდაპირ ვებ–გვერდიდან https://fsp.ge/ge/donate/171/

ჩვენც დავბერდებით! არ დაივიწყოთ თქვენი ახლობლები და ყოველთვის დაეხმარეთ მათ, ვისზეც არავინ ზრუნავს!