მეგობრებო, ძალიან გვიხარია, რომ ჩვენი გვერდის მკითხველები პირადად ულოცავენ მცირე საოჯახო ტიპის სახლების აღსაზრდელებს დაბადების დღეს. ეს უკვე კეთილი ტრადიცია გახდა, რომელიც ჩვენს მოზარდებს უაღრესად ახარებს! 

13 თებერვალს ანის 14 წელი შეუსრულდება! უფლის წყალობით და ჩვენი მეცადინეობით ამ გოგონას ნორმალური ბავშვობა დაუბრუნდა. დღეს იგი ცხოვრობს თბილ და მყუდრო გარემოში, სადაც ყველა პირობაა შექმნილი მოზარდის განვითარებისთვის.   

ანი არის მიზანდასახული და ნაკითხი ბავშვი. იგი კარგად სწავლობს და აქტიურად მონაწილეობს სახვადასხვა სახის საქალაქო ოლიმპიადაში. მას არაერთხელ გაუმარჯვია ინტელექტუალურ შეჯიბრებებში და ახლაც მორიგი კონკურსისთვის ემზადება! ჩვენ დავინტერესდით თუ რაზე ოცნებობს ეს გოგონა. 

-ანი, რა არის შენი ოცნება,  რა გაგახარებს ყველაზე მეტად? 

ანი: მე და ჩვენი სახლის კიდევ სამმა ბავშვმა დავიწყეთ სიარული ქობულეთის კულტურის სახლში, სადაც ვსწავლობთ ფანდურზე დაკვრას. ძალიან მომწონს ქართული ხალხური მუსიკა. განსაკუთრებით მიყვარს ფანდური. გაკვეთილებზე, რა თქმა უნდა, ვუკრავთ მასზე, მაგრამ  მეცადინეობის შემდეგ ამის საშუალება არ არის. სწორედ ამიტომ ვოცნებობ ფანდურზე. იცით, უკვე რამდენჯერმე დამესიზმრა კიდევაც... თუ მექნება ჩემი ფანდური, ბევრს ვიმეცადინებ, რომ კარგად დავეუფლო ამ ინსტრუმენტს. 

- სკოლაში როგორ სწავლობ?  რომელი საგნები გიზიდავს უფრო? ანი:  ყველა საგანი მიყვარს და მხოლოდ 10 ქულას ვღებულობ. განსაკუთრებით მიყვარს ქართული ლიტერატურა, ისტორია და მუსიკა. ამჟამად ვემზადები მორიგი ოლიმპიადისთვის, რომელიც ლიტერატურას მიეძღვნება. 

- ხომ არ გადაგიწყვეტია თუ ვინ უნდა გამოხვიდე? 

ანი: ჯერ არა, თუმცა უკვე ვფიქრობ. ალბათ, მომავალ წელს მეცოდინება ზუსტად. 

მეგობრებო, თქვენ ალბათ მიაქციეთ ყურადღება, რომ ჩვენ ხშირად ვაქვეყნებთ ინფორმაციას მცირე საოჯახო ტიპის სახლის აღსაზრდელთა დაბადების დღეების შესახებ. დიახ, ეს უკვე ტრადიციად იქცა და არ არის გასაკვირი, რომ ანიც მის „პირად დღესასწაულს“ გულის ფანცქალით მოელის. გოგონა დარწმუნებულია, რომ ამჯერადაც იქნება საჩუქრები, სიურპრიზები, სიმღერები, ცეკვები და სადღესასწაულო ტორტი.  ჩვენ მას ავუხდენთ მის სურვილს, გავშლით სუფრას,  მოვაწყობთ კონცერტს. 

თუ თქვენ გაქვთ სურვილი, რომ პირადად მიულოცოთ ანის დაბადების დღე, გელით მოუთმენლად! თქვენ ასევე შეგიძლიათ მას მისწეროთ წერილი და დაუმეგობრდეთ! 

თქვენ ასევე შეგიძლიათ გაიღოთ შემოწირულობა მისთვის საჩუქრის შესაძენად. ჩვენი ანგარიში:  GE15TB7194336080100003 ან  GE64BG0000000470458000 (დანიშნულება: საჩუქარი ანის). თანხის ჩარიცხვა შესაძლებელია ფონდის საიტიდანაც https://chernovetskyifund.ge/ge/projects 

ჩვენ აუცილებლად ჩაგაბარებთ ანგარიშს და მოგიყვებით იმის შესახე, თუ რა რეაქცია ჰქონდა ბავშვს თქვენი საჩუქრის მიღების შემდეგ. 

თქვენ, ასევე, შეგიძლიათ თანხის გადარიცხვა სწრაფი გადახდის ტერმინალებიდან NovaTechnology, TBCpay და ExpressPay. განყოფილებაში „ქველმოქმედება“ აირჩიეთ ჩვენი ფონდი (გადახდის წესები იხილეთ შემდეგ მისამართზე: https://goo. gl/GY2Gus). 

კარგი იქნება თუ ამ პოსტს გაიზიარებთ, რათა უფრო მეტი ადამიანი ჩაერთოს საქველმოქმედო საქმიანობაში. 

სიკეთე აკეთეთ და დაგიბრუნდებათ !