ჯერ კიდევ რამდენიმე წლის წინ, მათ სანატრელი ჰქონდათ პურის ნაჭერი და ლიმონათი, ისინი ოცნებობდნენ, სახლში რომ არ ეცემათ, სკოლაში რომ გაეშვათ…
დიახ, ამ ბავშვებმა ჩვენთან მოსვლამდე უმძიმესი წლები გადაიტანეს. მათ ცხოვრებაში ეს იყო შიშის, სევდისა და სიბნელის პერიოდი. ეს იყო დრო, როდესაც საჩუქრებს არავინ სჩუქნიდა, ხოლო საახალწლო ნაძვის ხე მათ თვალითაც არ ჰქონდათ ნანახი. რთულმა წლებმა ჩაიარა. საახალწლო დღესასწაული, ყველა თავისი ატრიბუტით, მათთვის უკვე ყოველწლიური ტრადიციული მოვლენაა და ჩვენ გვიხარია, რომ შეგვიძლია ბავშვებს ვაჩუქოთ სითბო, სიყვარული, სიმყუდროვე, ზრუნვა, მშვიდი გარემო და რაც ყველაზე მთავარია – ცხოვრების საგზური!
ახლოვდება ახალი წელი და, შესაბამისად, ჩვენი ბავშვთა სახლის აღსაზრდელებმა თოვლის ბაბუას წერილი მისწერეს, რომელშიც თავიანთი საახალწლო სურვილები ჩაწერეს და მოუთმენლად ელიან მათ ასრულებას.
ბავშვების ყველა სურვილი რეალურია!
უბრალოდ, უნდა მოვინდომოთ და ერთიანი ძალებით ვეცადოთ შევუქმნათ მათ სადღესასწაულო განწყობა, ვაჩუქოთ უზომო სიხარული, გავუთბოთ გულები და ჩავუსახოთ მომავლის რწმენა!
მეგობრებო, თუ გაქვთ სურვილი და შესაძლებლობა, შემოუერთდით ჩვენს აქციას. თქვენ შეგიძლიათ შეიძინოთ და თავად მიიტანოთ ბავშვთა სახლში საჩუქრები, რითაც ჩვენს აღსაზრდელებს ძალიან გაახარებთ!