ჩერნოვეცკის საქველმოქმედო ფონდი

საკუთარ მუხლებს „მიჯაჭვული“

„ჩემი მუხლები უკვე გახევებულია, როგორც კი ამინდი გაუარესდება, მაშინათვე საშინელი ტკივილები მეწყება, თითქოს რაღაც დანით სერავს ჩემს კუნთებს“
შეგროვებულია
697 ₾
დასრულებულია
წამოდექით ფეხზე და გააკეთეთ ჩვეული მოქმედებები, რომლებსაც თქვენს ცხოვრებაში ყოველდღე აქვს ადგილი: დაიბანეთ ხელი, მოამზადეთ სადილი, გაისეირნეთ ქუჩაში. დიახ, ამაში გასაკვირი არაფერია, მაგრამ...აი, 67 წლის ნანი იოსავას ამის გაკეთება არ შეუძლია. მშობიარობის დროს მან ქვედა კიდურების დამბლა გადაიტანა. მისი მორჩენა ვერ მოხერხდა და დარჩა ნანი მთელი ცხოვრება საკუთარ მუხლებს „მიჯაჭვული“. 
„ღმერთმა აშოროს ყველას იმის მწარე შეგრძნება, როდესაც ჯერ კიდევ ბავშვობაში ათვითცნობიერებ საკუთარ სენს და  გესმის, რომ ნორმალური და ბედნიერი  ცხოვრება არ გექნება, უკვე ყველაფერი დამთავრებულია და ოცნებაც ფუჭი იქნება“, - ამბობს ნანი და ვერ იკავებს ცრემლებს. 
როგორც მან გვიამბო, ადრეულ ასაკში ბევრს ტიროდა, გაურბოდა ბავშვებთან ურთიერთობას, რომლებიც მასზე ხუმრობდნენ და ხანდახან დასცინოდნენ კიდეც. მაგრამ მოგვიანებით, როცა წამოიზარდა, მტკიცედ გადაწყვიტა, რომ საკუთარი თავი უნდა მიეღო ისეთი, როგორიც არის…
ნანი მხოლოდ ჩოქვით გადაადგილდება. მუხლები მისთვის არის ერთადერთი საყრდენი ძალა, რომელთა მეშვეობით ეს ხანდაზმული ქალი საოცარ რაღაცეებს აკეთებს: ხოხვით ეშვება კიბეებზე, რომ საპირფარეშოთი ისარგებლოს და წყალი მოიტანოს, რომელიც ეზოშია; მუხლებზე „დამდგარი“ რგავს ბოსტანში  მწვანილს და ბოსტნეულს; დაჩოქილი რეცხავს იატაკს და ამზადებს სადილს...  და ასე გრძელდება 67 წელი! 
დღეს ეს ხანდაზმული ქალი დუხჭირ პირობებში ცხოვრობს. სიცოცხლის ბოლო წლებს მარტოობაში და სიღარიბეში ატარებს. მისი სახლი, რომელიც 1954 წელს არის აშენებული, ავარიულ მდგომარეობაშია: იატაკი დალპა, სახურავიდან წვიმა ჩამოდის, კედლები დანესტიანდა, ირგვლივ კი საშინელი სუნი დგას. ნანი ლამის გაყინულ ოთახში ცივ იატაკზე წევს და ხშირად პურის ფულიც არ აქვს. მისი სხეული უკვე ვერ უძლებს დატვირთვას და ჯანმრთელობის მდგომარეობა დღითიდღე უარესდება.
უკანასკნელი პერიოდის განმავლობაში მან ორჯერ გადაიტან კუჭის ოპერაცია და სასწაულად გადარჩა. 
„აი, ასე ვცხოვრობ....თუ  ამას ცხოვრება ჰქვია...მთელი ცხოვრება მუხლებზე გავატარე, ტკივილში და უსუსურ მდგომარეობაში“, - გვითხრა ნანი იოსავამ, რომელიც ლოცულობს, რომ ღმერთმა აშოროს ადამიანებს ავადმყოფობა და სულიერი დაცემა. 
მეგობრებო, ნანი იოსავა სასწრაფოდ საჭიროებს თქვენს დახმარებას. ამ მარტოხელა ხანდაზმულ ქალს სჭირდება საკვები პროდუქტები, მედიკამენტები, საყოფაცხოვრებო ნივთები, თეთრეული, ასევე მუხლების „ფიქსატორი“.  მოდით, გავიწოდოთ მას დახმარების ხელი, შევუმსუბუქოთ მძიმე ყოფა და გავუხანგრძლივოთ სიცოცხლე! 
 თუ გაქვთ შესაძლებლობა დაეხმაროთ ნანი იოსავას, თანხა შეგიძლიათ გადარიცხოთ ჩვენი ფონდის ანგარიშზე GE15TB7194336080100003 ან  GE64BG0000000470458000 (დანიშნულება: ნანი იოსავა) ან ჩარიცხოთ პირდაპირ ჩვენი საიტიდან    https://chernovetskyifund.ge/ge/projects
თქვენ, ასევე, შეგიძლიათ თანხის გადარიცხვა სწრაფი გადახდის ტერმინალებიდან NovaTechnology, TBCpay და ExpressPay. განყოფილებაში „ქველმოქმედება“ აირჩიეთ ჩვენი ფონდი (გადახდის წესები იხილეთ შემდეგ მისამართზე: https://goo. gl/GY2Gus).     
ჭეშმარიტი სიკეთე გულიდან მოდის! 

მსგავსი პროექტები: