სიცივის ალერგია

სიცივის ალერგია იშვიათი პათოლოგია არის, რომლის დროსაც, ორგანიზმი სპეციალური ცილების გამომუშავებას იწყებს, რომლებსაც უცხო სხეულებად აღიქვამს იმუნური სისტემა. შედეგად, პათოლოგიური იმუნური პასუხი ჩნდება, რაც სიცივის ალერგიის სიმპტომებს იწვევს. ეს დაავადება ასევე  ადამიანის სხეულზე დაბალი ტემპერატურის ზემოქმედებაზე ჰიპერმგრძნობელობის რეაქციად ითვლება.

გამომწვევი მიზეზები და ფაქტორები

სიცივის ალერგიის ზუსტი მიზეზები დღემდე უცნობი არის. თუმცა, ექიმები რამდენიმე რისკ-ფაქტორს განსაზღვრავენ, რამაც შეიძლება ამ პათოლოგიის განვითარების პროვოცირება გამოიწვიოს:

• მემკვიდრეობითობა. ყველაზე ხშირად, დაავადება ერთი და იმავე ოჯახის სხვადასხვა თაობის ადამიანებში გვხვდება. რისკის ჯგუფში ასევე არიან ისინიც, ვისაც ბავშვობიდან აწუხებს სხვადასხვა ალერგიული დაავადებები, მათ შორის ბრონქული ასთმა, ჭინჭრის ციება და კვინკეს შეშუპება.
• სისხლძარღვთა სისტემის დარღვევები, რაც ტერფებსა და ხელისგულებში მიკროცირკულაციის დარღვევას და სახის მიდამოში სისხლის მიმოქცევის გაუარესებას გულისხმობს. ეს ყველაფერი ხდება ზოგიერთი დაავადების ფონზეც: ვსდ, სიმსუქნე ან ჭარბი წონა, რეინოს სინდრომი.
• ქრონიკული დაავადებები. კუჭის ან ნაწლავების დაავადებების, აგრეთვე ზედა სასუნთქი გზების ანთებითი კერების ქონამ, შესაძლოა სიცივეზე ალერგიული შეტევის პროვოცირება გამოიწვიოს.
• ენდოკრინული დარღვევები, რომლებიც დაკავშირებულია ფარისებრი ჯირკვლის ან თირკმელზედა ჯირკვლის დისფუნქციასთან.
• კანის მაღალი მგრძნობელობა, ასევე დერმატოლოგიური დაავადებები, როგორიცაა ნეიროდერმატიტი, ეგზემა, ფსორიაზი.

ხელებზე სიცივის ალერგია ცივ საგნებთან მუდმივი კონტაქტით და ღია სივრცეში მუშაობით შეიძლება იყოს გამოწვეული. რაც ასევე ჭურჭლის რეცხვას, სარეცხი საშუალებების გამოყენებას, თოვლის წმენდას, საცურაო აუზებსა და ღია წყალსაცავებში ბანაობას და თქვენს რაციონში ნაყინის ან ცივი სასმელების მუდმივ გამოყენებას მოიცავს.

გარდა ამისა, მოზრდილებში ექიმის დანიშნულებისა და მეთვალყურეობის გარეშე იმუნოსტიმულატორების ხანგრძლივ გამოყენებას სიცივის ალერგიის ერთ-ერთ რისკ-ფაქტორად თვლიან ექიმები. აღნიშნულია, რომ დაავადება ჩვეულებრივ კანისა და ლორწოვანი გარსების მაღალი გამტარიანობის მქონე ადამიანებში ვითარდება. შეტევა შესაძლოა, ანტიბიოტიკებით, მიორელაქსანტებით, რადიოკონტრასტული საშუალებებით და აგფ ინჰიბიტორებით იყოს გამოწვეული. აღნიშნულია, რომ ეს პათოლოგია კვებით ალერგიულ რეაქციებთან ერთად, ზაფხულში ჩნდება.

სიმპტომები

სიცივის ალერგიის სიმპტომები თითოეული ადამიანისთვის შეიძლება განსხვავებული იყოს. ყველაზე ხშირად ზიანდება სხეულის ის ადგილები, რომლებიც ცივ ჰაერთან ან საგნებთან არის კონტაქტში. ზოგიერთ შემთხვევაში, შეიძლება მოხდეს ლორწოვანი გარსის გაღიზიანება, ნაკლებად გავრცელებულია სიმპტომები, რომლებიც დაკავშირებულია კუჭ-ნაწლავთან.

მნიშვნელოვანია ვიცოდეთ, თუ როგორ ვლინდება სიცივის ალერგია. ყველაზე ხშირად, ის როგორც ჭინჭრის ციება ჩნდება, რომელიც ვლინდება სახის კანზე, ტუჩებზე ან სხეულის სხვა ნაწილებზე, რომლებიც ტანსაცმლით არ არის დაფარული. კანის სიწითლე, შეშუპება და ძლიერი ქავილი  აღინიშნება. კანზე უამრავი ბუშტუკი ჩნდება, რომლებიც ინტენსიურ ქავილს იწვევს, მოფხანვის შემდეგ კი, უსიამოვნო, სისხლიანი ფუფხით იფარება.

უნდა ვიცოდეთ, როგორ გამოიყურება სიცივის ალერგია.

ზოგჯერ, დაზიანება შეიძლება კონტაქტურ დერმატიტს ჰგავდეს – სიწითლე და ქავილი კონკრეტულ არეში. ასეთ შემთხვევაში, ბუშტუკები ჩნდება პროვოცირების ფაქტორზე ზემოქმედებიდან 1-2 დღის შემდეგ. ისინი სეროზული სითხით ივსება. გახსნის შემდეგ კი, მათ ადგილას წარმოიქმნება მცირე ეროზია, რომელიც ნაწიბუროვანი ქსოვილის წარმოქმნის გარეშე ქრება. თუ სიცივეზე ალერგიის გამოვლინება კანზე ქრონიკულ სახეს იღებს, მაშინ ეპიდერმისის მუდმივი სიწითლე და აქერცვლა ვითარდება, ჩნდება ბზარები და ჭრილობები, რომლებიც დიდი ხნის განმავლობაში არ ხორცდება.

სიცივეზე ალერგია სახეზე შეიძლება გამოვლინდეს ქეილიტის, ანთებითი დაავადების სახით, რომელიც ტუჩების წითელ ყაეთანს აზიანებს. პაციენტი სიწითლეს, მუდმივ სიმშრალეს, აქერცვლას და ამ მიდამოში კანის დაჭიმვის შეგრძნებას უჩივის. ადამიანს მუდმივად უწევს ტუჩების ლოკვა, რაც მნიშვნელოვნად აუარესებს მდგომარეობას.

სიცივეზე ალერგიის ნიშნები შეიძლება თვალების სიწითლე, წვის შეგრძნება და ჭარბი ცრემლდენა იყოს. სიმპტომები შეიძლება გამოვლინდეს როგორც ვაზომოტორული რინიტი ცემინებისა და ცხვირიდან გამონადენის შეტევებით ან, როგორც ბრონქოსპაზმი დახრჩობისა და უჰაერობის შეგრძნებით.

პრევენცია

დაავადების განვითარებაში მნიშვნელოვან როლს ასრულებს პრევენცია. აქ ჩამოთვლილია გარკვეული წესები, რომლებიც უნდა დაიცვათ:

• ცივ სეზონში გარეთ გასვლამდე, სხეულის ღია ნაწილებზე მალამო ან კრემი, ხოლო ტუჩებზე ჰიგიენური პომადა უნდა წაისვათ.
• მაქსიმალურად დაიფარეთ სხეულის ღია ნაწილები, სპეციალური ქუდების, შარფების, ხელთათმანების და სხვა ტანსაცმლის საშუალებით. ძლიერი ქარის დროს, აუცილებელია ატაროთ კაპიუშონი.
• სახლის პირობებში ყოველდღე უნდა გაიკეთოთ სახისა და ხელების მასაჟი, რაც ხელს შეუწყობს სისხლძარღვების გამაგრებას და ცივ ამინდში გარეთ ყოფნისას ალერგიის სიმპტომების სწრაფ გაჩენას თავიდან აგაცილებთ.
• როგორც ზამთარში, ასევე ზაფხულში რეკომენდებულია ცივი სასმელების, დესერტებისა და ნაყინის მოხმარებაზე უარის თქმა.
• სწორად უნდა იკვებოთ და რაციონში შეიტანოთ ახალი ბოსტნეული და ხილი. წელიწადში ორჯერ, ექიმის რეკომენდაციით, პოლივიტამინების კურსი ჩაიტარეთ.
• გამოიყენეთ კოსმეტიკა, რომელიც მხოლოდ ძალიან მგრძნობიარე კანისთვის არის განკუთვნილი.
• ძლიერი ყინვის დროს, უმჯობესია საერთოდ არ გახვიდეთ გარეთ და, თუკი ეს შესაძლებელია, სახლში, სითბოში დარჩეთ.

კვების ძირითადი წესებისა და ჯანსაღი ცხოვრების წესის დაცვით, თქვენ სიცივეზე რეაქციის შეტევის განვითარების თავიდან აცილებას შეძლებთ. თუკი, ის მაინც განვითარდა, დაუყოვნებლივ უნდა მიმართოთ ექიმს.