თქვენ სიცოცხლე დაგვიბრუნეთ და იმედი მოგვეცით!

„ეს ჩვენს ოჯახში ყველაზე ტკბილი ახალი წელი იყო. ამდენი ნუგბარი და ტკბილეული ბავშვებს არასდროს ჰქონიათ. ნეტავ გენახათ, როგორ უხაროდათ! სიხარულისგან გული გასკდომას მქონდა!“ - გვიყვება ნუნუ.

ქალს ეღიმება, მოჭარბებული გრძნობებისგან ზოგჯერ ენა ებმის; გვიყვება, რომ მათი ოჯახის ცხოვრება ძალიან შეიცვალა პოსტის დაწერის შემდეგ, რომელიც სულ ცოტა ხნის წინ გამოვაქვეყნეთ:

https://chernovetskyifund.ge/ge/projects/655-kbiltsetskhlashvili/.

ახლა, ბედნიერებისგან სახეანთებულ ნუნუში საერთოდ ვეღარ იცნობთ იმ საბრალო ქალს, რომელმაც ჩვენს ფონდს სრულიად სასოწარკვეთილმა მიმართა.

ოჯახის თავს დატეხილმა პრობლემებმა სამი შვილის დედა ძლიერ გატეხა. მისი შუათანა ბიჭი მძიმედ არის ავად: ბავშვი ქრონიკული ეპილეფსიით იტანჯება. ოთხი წლის ლუკას წამლები, გამოკვლევები და საგანგებო პროცედურები ესაჭიროება, ამას კი არც თუ ისე ცოტა ფული სჭირდება, რომელიც მათ უბრალოდ არ აქვთ.

ოჯახი ისედაც უკიდურეს გასაჭირში იმყოფებოდა: სახლი ინგრევა, მათ კი არც საჭირო ტექნიკა და არც ასატანი საცხოვრებელი პირობები აქვთ; არადა, სახლში კიდევ ორი პატარა ბავშვი ცხოვრობს: ნიკა (6 წლის) და იზოლდა (წლინახევრის). ყველას მშობლების ყურადღება სჭირდება. ნუნუს მეუღლემ მუშაობის შესაძლებლობა დაკარგა. ოჯახი მხოლოდ სოციალურ დახმარებაზე ცხოვრობს, რომელიც ბავშვების გამოსაკვებად და პატარა ლუკასთვის წამლების საყიდლად არ კმარა.

მაგრამ თქვენი წყალობით, ჩვენო ძვირფასო მეგობრებო, ჩვენ კბილცეცხლაშვილების დახმარება და მათთვის წამლების, სამედიცინო ნივთებისა და საყოფაცხოვრებო ტექნიკის შეძენა შევძელით, რომელიც ოჯახს ასე სჭირდებოდა. ჩვენმა კეთილმა მეგობრებმა და დამხმარეებმა სიკეთე და დიდსულოვნება კიდევ ერთხელ გამოიჩინეს. თქვენი მონაწილეობის წყალობით, დღეს ნუნუ იღიმის! თქვენ მის ოჯახს თქვენი სიყვარული აჩუქეთ!

ჩვენი ფონდი მთელი გულით უხდის მადლობას ყველას, ვინც კბილცეცხლაშვილების ოჯახის გასაჭირის მიმართ გულგრილი არ დარჩა, ვინც მათ თუნდაც ერთხელ მაინც დაურეკა და დახმარების ხელი გაუწოდა! უღრმესი მადლობა ყველას!

– ნუნუ, შეგიძლიათ დაწვრილებით გვიამბოთ, როგორ შეიცვალა თქვენი ცხოვრება პოსტის გამოქვეყნების შემდეგ?

ნუნუ: ჩვენს ოჯახში ყველაფერი გარდაიქმნა. ჩვენ უკეთესი მომავლის იმედი გაგვიჩნდა; არადა, სულ ცოტა ხნის წინ გვეგონა, რომ ჩიხში ვართ; ჩვენს პრობლემებს დასასრული არ უჩანდა. თქვენი ფონდი და კეთილი ხალხი უზომოდ დაგვეხმარა. პოსტის გამოქვეყნებიდან მეორე დღესვე რეკვა დაიწყეს; გვეკითხებოდნენ, აინტერესებდათ, როგორ ვცხოვრობთ... და იცით, დღემდე რეკავენ... რომ აღარაფერი ვთქვათ საჩუქრებზე - ეგ საერთოდ ცალკე თემაა. იმდენი საჩუქარი მივიღეთ, სიტყვები არ მყოფნის! ცრემლებიც კი წამომივიდა, როდესაც მაცივარი, სარეცხი მანქანა, პურის საცხობი ღუმელი, საწოლის თეთრეული და ბავშვებისთვის უამრავი ტკბილეული გვაჩუქეს. ბოლომდე ვერც კი ვიჯერებდი, რომ ეს ყველაფერი ჩვენთვის იყო!

მაგრამ ყველაზე მთავარი ის არის, რომ თქვენმა ფონდმა ლუკასთვის უზომოდ დიდი რაოდენობის წამლები და საფენები შეიძინა. სიტყვები არ მყოფნის! ახლა, მე და ჩემს მეუღლეს შეგვიძლია წამლებზე კარგა ხანს აღარ ვიდარდოთ!

სხვათა შორის, ცოტა ხნის წინ, ჩემს მეუღლეს თბილისში სამსახური შესთავაზეს და ეს ყველაფერი თქვენი ფონდის წყალობით მოხდა. დამრეკმა გვითხრა, რომ მან ჩვენ შესახებ სოციალურ ქსელში წაიკითხა და შეიტყო, რომ ჩემი ქმარი სამსახურის გარეშე დარჩა. და აი, ჩემს მეუღლეს სამსახური შესთავაზეს. იმედი მაქვს ყველაფერი გამოვა!

– გვჯერა, რომ ყველაფერი გამოგივათ! ნუნუ, უფრო დაწვრილებით გვიამბეთ, რა რეაქცია გქონდათ საჩუქრებზე?

ნუნუ: ძალიან გამიხარდა! სიხარულისგან ავტირდი კიდეც. სახლში მაცივარი არ გვქონდა, ახლა კი, თქვენი წყალობით, შემიძლია საჭმელი მოვიმარაგო და აღარ მეშინოდეს, რომ დამჟავდება... პურის საცხობი ღუმელიც გვაჩუქეს. პურის ყიდვა ყოველთვის არ გამოგვდის, რადგან ძვირი ღირს; მთელი ჩვენი შემოსავალი კი ლუკაზე იხარჯება. ახლა უკვე შემიძლია, რომ ახალი პური სახლში თავად გამოვაცხო. ბავშვისთვის ამაზე უკეთესი რა უნდა იყოს?

მაგრამ ყველზე მნიშვნელოვანი საჩუქარი ჩვენთვის მაინც სარეცხი მანქანა იყო. როდესაც სახლში სამი ბავშვია, სარეცხს ბოლო არ უჩანს. ადრე ხელით რეცხვა მიწევდა, თანაც გარეთ, ცივ წყალში. ეს საშინელებაა! ახლა კი სარეცხი მანქანა მაქვს, რომელმაც ცხოვრება მნიშვნელოვნად გამიმარტივა; სანამ მანქანა რეცხავს, მე შემიძლია ბავშვებს მეტი დრო დავუთმო... საწოლის თეთრეულიც გაცვეთილია. კეთილი ხალხი რომ არა, ჩვენ ახლის ყიდვას ვერ შევძლებდით. როგორც ხედავთ, სახლში ბევრი რამ გვაკლდა. ყველაფერს ვერც იყიდი -  შესაძლებლობა არ გვაქვს. მაგრამ მადლობა თქვენს ფონდს და ყველა იმ კეთილ ადამიანს, რომლებიც დაგვეხმარნენ! თქვენ სიცოცხლე დაგვიბრუნეთ და იმედი მოგვეცით!  

განსაკუთრებული მადლობა იმისთვის, რომ ჩემს შვილებს უამრავი ტკბილეული  აჩუქეთ და ისინი ასე გააბედნიერეთ!

–ბავშვებს ყველაზე მეტად რა ტკბილეული მოეწონათ?

ნუნუ:მათ ყველაფერი მოეწონათ! ეს ჩვენს ოჯახში ყველაზე ტკბილი ახალი წელი იყო. პატარებს ისე უხაროდათ, ისე იცინოდნენ... ჩვენ კი, მშობლებს, მათთან ერთად გვიხაროდა. ბავშვებს ამდენი ტკბილეული ჯერ არ უნახავთ. ნამდვილი სასწაულია! დღესასწაულმა წარმატებით ჩაიარა! (იცინის.) სხვათა შორის, ახალი წლის ღამეს თოვლის ბაბუა გვეწვია და ბავშვებს უამრავი საჩუქარი მოუტანა: სურსათი, სასკოლო ნივთები, ტკბილეული, ტანსაცმელი და ფეხსაცმელი. გვითხრეს, რომ თოვლის ბაბუა ანუკი არეშიძემ გამოგზავნა... და ეს ყველაფერი თქვენი დამსახურებაა! თქვენი პოსტის შემდეგ ჩვენ ყურადღება მოგვაქციეს!

–ნუნუ, პოსტის გამოქვეყნების შემდეგ ხელისუფლების მხრიდან თუ გამოგეხმაურათ ვინმე?

ნუნუ:სამწუხაროდ, არა. განსაკუთრებით აღსანიშნია ჩვენი ადგილობრივი ადმინისტრაცია, რომელსაც არანაირი რეაგირება არ მოუხდენია. მით უმეტეს, რომ მათ ჩვენი პრობლემების შესახებ იციან, რადგან მათთვის დახმარების სათხოვნელად არაერთხელ მიმიმართავს; მაგრამ ისინი სულ ერთსა და იმავეს მპასუხობენ: „ეს ჩვენს კომპეტენციაში არ შედის“. აბა, ვის კომპეტენციაში შედის? სათქმელი სხვა არაფერი მაქვს!

– ჩვენი პოსტის შემდეგ პირადად ვინ დაგირეკათ? იქნებ გახსოვთ მათი სახელები?

ნუნუ: სიმართლე გითხრათ, სახელები არ მიკითხავს. ჯერ ერთი, ძალიან ვიყავი დაბნეული, რადგან ამდენ ზარს არ ველოდი; ტელეფონი არ გაჩუმებულა... მეორეც, განა სახელები მნიშვნელოვანია? ჩემთვის ძალიან სასიამოვნო იყო თუნდაც იმის შეგრძნება და დანახვა, რომ ვიღაცას ჩვენი გასაჭირი აინტერესებს, რომ ჩვენს პატარა ქვეყანაში ამდენი კეთილი ადამიანი ცხოვრობს! იცით, ზოგჯერ, უბრალოდ დარეკვამ და მოკითხვამ შეიძლება ადამიანი გადაარჩინოს, მას მხარდაჭერის შეგრძნება გაუჩინოს. ყველაზე მთავარი სწორედ ეს არის!

– ვინმე სხვებზე მეტად თუ დაგამახსოვრდათ?

ნუნუ: დიახ, დამამახსოვრდა. ჩვენთან ერთი გოგონა მოვიდა, სახელად ანა; მითხრა, რომ ეკლესიასთან ერთად, ჩვენთვის დახმარება შეაგროვეს. სამწუხაროდ, არ ვიცი, რომელი ტაძრიდან იყვნენ; მხოლოდ ის ვიცი, რომ ადგილობრივი ეკლესიაა. სიმართლე გითხრათ, რაღაცნაირად დავიბენი კიდეც და არ მიკითხავს. იმდენი რამ მოგვიტანეს!.. ასევე, ახალი წლის წინა დღეებში, ვიღაცამ 200 ლარი გადმორიცხა; მერე დაგვირეკა და მითხრა, რომ ბავშვებისთვის დღესასწაული მომეწყო და მათთვის საჩუქრები მეყიდა. უდიდესი მადლობა ყველას! და მადლობა თქვენს ფონდს, რომ ახალი მეგობრები გვაჩუქეთ!

– რას ნიშნავს ეს მხარდაჭერა და დახმარება პირადად თქვენთვის?

ნუნუ: ჩვენი ოჯახისთვის ეს ძალიან ბევრს ნიშნავს! თქვენი დახმარებისა და მხარდაჭერის, ყველა ამ კეთილი ადამიანის ყურადღების გარეშე არც კი ვიცი, რა გვეშველებოდა. თქვენ ძალიან დაგვეხმარეთ, იმედი მოგვეცით, მეგობრები გვაჩუქეთ და ჩვენ ახლა ვიცით, რომ მარტო აღარ ვართ. სამწუხაროდ, სიტყვებით ვერ გადმოვცემ იმ ყველაფერს, რისი თქმაც მინდა და რამდენად მადლიერი ვარ ყველასი!

– ნუნუ, შეიძლება თქვენს უფროს ვაჟს გავესაუბრო? ნიკა, საჩუქრები მოგეწონა?

ნიკა (6 წლის): მე ყველაფერი მომეწონა! თქვენ ბევრი კარგი ნივთი გვაჩუქეთ. ჩვენ ახლა მაცივარი და სარეცხი მანქანა გვაქვს და დედა პურს და ორცხობილებსაც გამოგვიცხობს ხოლმე. დედა ძალიან კმაყოფილია და სულ იღიმის. ახალ წელს იმდენი ტკბილეული გვქონდა! ისეთი გემრიელი!.. და თოვლის ბაბუაც მოვიდა. ის ადრე არასდროს მოსულა, ამჯერად კი მოვიდა და საჩუქრებიც მოგვიტანა.

– ნიკუშ, ძალიან გვიხარია, რომ ყველაფერი მოგეწონა! მოდი, ახლა დედას ვკითხოთ, კიდევ რა დახმარება სჭირდება? რით შეუძლიათ ჩვენს მკითხველებს თქვენი მხარდაჭერა?

ნუნუ: იმ ყველაფრის შემდეგ, რაც ჩემი ოჯახისთვის გააკეთეთ, განა გავბედავ, რომ კიდევ რამე გთხოვოთ?! თქვენი ფონდისა და კეთილი ხალხის წყალობით შემიძლია წამლებზე და საკვებზე კარგა ხანს აღარ ვიდარდო... დარჩენილ პრობლემებზე საუბარი ახლა ძალიან მრცხვენია, მაგრამ სამწუხაროდ, ისინი ჯერ კიდევ არსებობენ. რამდენიმე თვეში ერთხელ, მე და ლუკა თბილისში პროცედურებზე ჩავდივართ. ამისთვის არც ისე ცოტა ფულია საჭირო - მხოლოდ გზაზე 400 ლარამდე იხარჯება; ამას მკურნალობის ხარჯებიც ემატება. ჩვენ ამხელა თანხები არ გაგვაჩნია... მაგრამ ბავშვი ექიმთან არის სატარებელი, მას ყველა აუცილებელი პროცედურა უნდა ჩაუტარდეს, რომ მან ცხოვრების გაგრძელება შეძლოს. რა ვქნა, არ ვიცი.

ასევე, რადგან პრობლემებზე დავიწყეთ საუბარი - ლუკა ძალიან აქტიური ბავშვია, მას შიშის გრძნობა არ აქვს. საწოლზე, კარადებზე აძრომა და იქიდან გადმოხტომა უყვარს. ზოგჯერ ისე ვარდება, რომ მეშინია, თავს რამე არ ავნოს. ამიტომ მინდა, ლეიბის მსგავსი ნივთი შევიძინო, რომ ბავშვი რბილად დაეცეს და რამე არ მოიტეხოს.

– რას ეტყოდით ყველა იმ ადამიანს, ვინც თანხების შეგროვებაში დაგვეხმარა?

ნუნუ: მინდა, მათდამი მადლიერება გამოვხატო! დიდი მადლობა ის ყველაფრისთვის, რაც ჩვენი ოჯახისთვის გააკეთეთ! მადლობა სიხარულისა და ღიმილისთვის, საჩუქრებისა და იმედისთვის. ეს ყველაფერი ჩვენთვის ფასდაუდებელია! ჩემო ძვირფასო მეგობრებო, მინდა ჯანმრთელობა გისურვოთ! უფალმა დაგლოცოთ!

***

ჩვენო ძვირფასო მეგობრებო, დიდი მადლობა ყველას, ვინც კბილცეცხლაშვილების ოჯახი გასაჭირში არ მიატოვა! ყოველ ჩვენგანს თავისი პრობლემები აქვს, მაგრამ გახსოვდეთ, რომ ჩვენი გასაჭირი ზოგჯერ ისეთი საშინელი არ არის, როგორიც სხვების. ყველა ჩვენგანისთვის ასეთ რთულ დროს, ჩვენ გულგრილები არ უნდა დავრჩეთ. თუკი კბილცეცხლაშვილების ოჯახის მხარდაჭერა და მათთვის დახმარების ხელის გაწოდება შეგიძლიათ, გადადგით ეს ნაბიჯი - დაურეკეთ მათ, ჰკითხეთ, რამე ხომ არ სჭირდებათ. ოჯახში სამი ბავშვია, საბრალო ლუკას კი უფრო მეტი და განსაკუთრებული ყურადღება სჭირდება. ბავშვები - ჩვენი მომავალია, ჩვენი ქვეყნისა და ერის მომავალი! მოდით, გავაგრძელოთ კბილცეცხლაშვილების ოჯახის დახმარება!

და აუცილებლად გააზიარეთ ჩვენი პოსტი, რომ ამ ოჯახის გასაჭირის შესახებ შეიტყონ თქვენმა მეგობრებმაც! ეს ძალიან მნიშვნელოვანია!

კიდევ ერთხელ, დიდი მადლობა ყველას!

ჩვენი ფონდის ანგარიშია:

#GE15TB7194336080100003

#GE42LB0115113036665000

#GE64BG0000000470458000

(დანიშნულება:კბილცეცხლაშვილების ოჯახი).

თანხის გადმორიცხვა შეგიძლიათ ჩვენი ვებ-გვერდის მეშვეობითაც.

თანხის ჩარიცხვა ასევე შესაძლებელია Nova Technology, TBCpay, ExpressPay ტერმინალებიდან. ქვეთავში “ქველმოქმედება“ მოძებნეთ ჩვენი ფონდი (ფონდის დამატებით უფლება-მოვალეობებს შეგიძლიათ გაეცნოთ ბმულზე https://goo.gl/GY2Gus).

ერთი ზარი გადაარჩენს სიცოცხლეს: 0901 200 270.